أشياء تحدث في آخر يوم من رمضان

بدأت الأشياء بدخولي النادر للمطبخ عشان اعمل صينية بطاطس في الفرن:

ودي المكونات

وبعدين حطيتهم في الصينية كدة:

وبعدين سويت البطاطس على النار:

وبعدين دخلت الفرن وخرجت (هي فيها لحمة مسلوقة مسبقًا عشان ماحدش يفتكر إنها اتحرقت) :)

وهنا ييجي دور الرز بشعرية:

وفرختنا الحلوة اللي سلقتها:

وبعدين دخلت الفرن برضه:

-------------

لأنه آخر نهار في رمضان، كعادتي كان لازم أصور غروب الشمس السنة دي برضه:

وهنا كان قرآن المغرب انتهى :)

-------------

و جا زوار تانيين في البيت:

السمك الجديد

والعصافير الجديدة.

---------

وخلص رمضان وجه العيد، أهلًا بيه :)

 

يا سكني، كثير من هؤلاء الناس الذين نراهم يمضون من حولنا في نهر الحياة، دهستهم الحياة من قبل مرة أو مرات. لكنهم انتفضوا ليواصلوا المسير، فالحياة طيبة برغم كل شيء، وبرغم أنها في مثل تلك الحالات تغدو مثقلة بذكري اللحظات الأليمة..  تغدو مفعمة بالشجن.. والشجن حزن جليل.. والجلال أعلي مراتب الفتنة..يا سكني

 محمد المخزنجي

وأجمل ما فيها السكن..

ما بنفسي

متى يفقد المرء وقاره ليصبح مثل أي مواطن (حمار) يظن نفسه فوق الجميع؟ وما فائدة تربية (الليدي) التي اقتسمها أهلي ومدرسة الراهبات في مجتمع فوضوي يظن الذوق واللطافة ضعفًا؟ هل ارتكبوا خطيئة تحويل حياتي إلى صراع مستمر تدور رحاه على أعصابي كل يوم؟ حيث تقف إمكانية إطلاق العنان لغيظي المكبوت من الجهلة معدومي الأدب المنتشرين كالسرطان أمام ما أعرف من صفات فتاة (بنت ناس) جيدة التربية.

----

ماذا يفعل طبيب في أواخر العشرينات يظن نفسه صديقك؟

1-

 يخبرك أنه خائف على مصلحتك وكلما رأى اسمك على المسنجر يقول باستظراف ايه اللي جابك، روحي ذاكري
  .

2-يعتبر ثوابته ملزمة للجميع، وبما إنك أنثى سيعتبر تلقائيًا أنك قطعة عجين يشكلها على مزاجه، لأنك -رغم تجاوزك سن الرشد ورغم إن عقلك يوزن 40 منه ومصاصة فوق البيعة- في نظره محتاجة حد يقوم بدور أخوي (كأنك ناقصة اخوات).

3- ناقشيه في أي حاجة وسيصبح الوضع أشبه بحشر قدمك في جزمة ضيقة، تجيبيها كدة تجيبيها كدة مابتنفعش. وسيكون مقتنعًا تمامًا أنه شخص (لارج) ده كفاية إنه سايبك تتكلمي يا شيخة!

4- سيخبرك عن مستقبلك الأسود في الطب وغير الطب، وسيقول لك الجملة المأثورة (أصل الطب مش للبنات)-على أساس إنك طالبة في ثانوي لسة بتفكر تدخل الكلية ولا لأ- ولا ينتبه-بسلامته- إنه ممكن يكون مستقبله هو بس اللي اسود. وبهذا ينتفي جدوى النقطة رقم واحد، ازاي المستقبل اسود وفي نفس الوقت بتقول ذاكري؟ انت مالك بقى!

5-هيقولك:أصل أنا معجب بعقلك، على أساس إنه لما يعرف بنت هيعجبه فيها عقلها، لا ياعم.. البنات ناقصات عقل ودين، خليك في جنب والنبي.

6- مفيش ستة، أي واحد شايف إن مخه يسع 1\8 أفكاري.. ياعم روح، قرفتوني!

المولد الكبير

أقف في ركن متمهلة.. أفكر، يمر بي الجمع الهائج منطلق إلى مكان لا أعرفه -ويبدو لي أنهم لا يعرفونه كذلك- وهناك دائمًا شخص ما بالمقدمة، يلوح من بعيد، أتخيله شخصًا برابطة عنق و حنجرة صاخبة، تنفر أوردته، يتصبب عرقه، وتهتز سبابته حسب وقع كلماته. قد يتوقف البعض ممن يعرفونني للسؤال: لم لا تلحقين بنا؟؟ هذا جمع الإيجابيين، هذا جمع التغيير! ثم يخافون ألا يلحقوا بالجمع فيمضون سريعًا إلى مكانهم المجهول.

أتساءل: وماذا بعد؟

أمضي أنا في اتجاه آخر وحدي تمامًا، ببطء وحذر، لا يصادفني سوى مارة متناثرين على الأرصفة، لاصخب ولا زحام، لكن الوحدة قد تطول قبل مصادفة أحدهم، نتبادل ابتسامة وقار خفيفة ثم نمضي كل منا في طريقه. يحدث أحيانًا أن يتقاطع طريق الجمع الهائج مع دروبي الهادئة، يوشكون على دهسي بانفجار حناجرهم وتشنج أجسادهم، لكنهم يمرون بوقوفي الثابت في منتصفهم، ينشقون على الجانبين ثم يلتحمون كما كانوا وكما لو كنت غير مرئية. يخفت الصراخ والضجيج تدريجيًا بانقضاء الجمع.

ألتفت لآخر آثارهم وأفكر: ألا يمنح الجمع قوة؟

لكن قوة التدليس والحلول الهينة لا تمنحني بل تسلبني ذاتي، فأتردد لبرهة وألقي نظرة أخيرة على ركن قصي مرت به العاصفة منذ قليل ثم أمضي في طريقي.


---
الخلاصة: أنا أكره الصراخ وأكره الضجيج، أكره برامج الاكتئاب المسائي والأشخاص ذوي المظاهر البراقة المنصّبين محامون وقضاة لأوضاع نصيبهم فيها حسابات بنكية. أكره ما يكتبه حاملو مصابيح (الحقيقة الليبرالية) المنتمين لقطيع (أضداد القطيع).

المسألة باخت بااااااااااخت أوي، من سنة 2005 ماحدش خد باله إن وجوه عواجيز الفرح واحدة ماتغيرتش حزب الغد.. حركة كفاية.. حزب الجبهة.. الجمعية الوطنية، وهاخد على جنب 6 إبريل (دول شباب الفرح المهيسين).

حرية الصراخ مكفولة للجميع، ويلا نعمل وقفة احتجاجية على عدم تعيين بنت خالة أخت الموظف (الغلبان) في مصنع السكر، وهاتوا اليوم السابع تاخد لنا صورتين حلوين، وبالمرة ننزل فيديو على اليوتيوب. أنا واقف بزعق\مش بزعق، إذن أنا وطني وماحصلتش.. وهروح بيتنا آكل زبادي وأنام مرتاح الضمير عشان ايييييه؟ (اخص عليكم؟ ما قلنا وطني وماحصلتش!).

هو ينفع الواحد يعمل وقفة احتجاجية على الوقفات الاحتجاجية؟

ع شو كنت تجافيني؟

اعتصام/دوشة مستشفى المنصورة الجامعي

 شفتوا الفيديو ده على موقع اليوم السابع؟

موظفو مستشفى الجامعة عملوا الاعتصام- الدوشة دي لأن مدير المستشفى وقع عليهم جزاءات، ماشي؟

بداية كدة أنا مش متعاطفة إطلاقًا مع الموظفين والعمال، انت كمواطن عادي (بلاش دكتور) رايح تخلص ورق في مستشفى الجامعة، لا تتصور مثلًا إن ده مختلف خالص عن أي مصلحة حكومية، من أول الموظف اللي مش هيبص في وشك أساسًا على الصبح لأنه لسة تقريبا ماصحاش من النوم رغم سندويتش الفول وكوباية الشاي اللي قدامه. ورغم إن الساعة عدت 9 .

وطبعًا قصة صلاة الضهر اللي -شوف الإيمان-كل الموظفين بيصلوها في وقت واحد، وياويلك لو فكرت تخلص ورق بعد الساعة واحدة لأن -طبعًا- مدام /فلانة استأذنت!

إذن احنا بنتكلم عن الموظف اللي منكد عيشتي وعيشتك في أي مكان.

المكان اللي متصور فيه الفيديو الهول الرئيسي للمستشفى، يعني على بعد كام متر بطول أدوار المبنى  أقسام الجراحة والأنف والأذن والنسا والتوليد والذي منه اللي المفروض فيها مرضى، بذمتكم فيه حد عاقل يعمل الدوشة دي في مستشفى؟

الدكتور منير مسك المستشفى من شهرين بس، وارد جدًا يكون بيعمل حاجة زي (انضباط) وزير التعليم، ايه اللي فرق دي عن دي؟ انت كشخص بتتعامل مع المكان عايز ايه غير إنك تلاقي الموظف في أوقات العمل وتخلص حاجاتك وتمشي في آدمية؟ وإذا كان الوضع من زمان مقلوب لأننا لما ركنا القانون العرف غلب، خلاص نسيبه يعني.. مايتعدلش؟؟

اليوم ده أنا كنت موجودة في المستشفى أصلا، ماعتقدش إن فيه حاجة اتأثرت.. ماهو الطبيعي أصلًا إن الموظفين مش بيشتغلوا، ايه الجديد؟  والموظف اللي شايف شغله هتطوله الجزاءات ليه؟

أشك إن كان حد قرر يكلم مدير المستشفى بهدوء الأول لأن انتقال أخبار الاضرابات والاعتصامات خلت الناس تلجأ للحل السهل اللي يظهرهم في صورة الأبطال اللي بيقاوموا الظلم، ومفيش مانع الإعلام ينشرها، بس عشان الاتصال والنشر بقى أسهل. لكن مش ضروري عشان معاهم حق.

اللي أنا أعرفه إن النظام الصح بيربط السايب ويعدل المعوج، لو كنا هنقاوم النظام عشان اتعودنا على الهرجلة يبقى خلينا كدة، النظام هو الفرق اللي يكاد يكون ساخر بين أقسام مستشفى الجامعة الضخمة وقسم صغير يشبه حديقة جميلة لمنزل مكركب  هو قسم الروماتيزم والتأهيل، ويمكن اللي يضحك أكتر إن مركز الكلى ملاصق لمستشفى الجامعة (آه والله !)  وكلها اسمها مستشفيات جامعة المنصورة.

عودة

اتأخرت؟

ماظنش