عتـــــــبة جديــــــــــدة

4 comments


التدوينة دي استفتاح الوورد على اللاب الجديد، حسيت إني عاوزة أقول أي كلام كتسجيل لبداية كتابتي عليه، كنت متوقعة إنه لما تزيد مساحة خصوصيتي هقدر أكتب أكتر، دي من أكتر الحاجات اللي كانت مضايقاني في البي سي.. بكتب وسط الدوشة والحركة، وكتير بكتب على ورق الأول.. أنا بحب الورق، ماظنش إن بعد اللاب هستغنى عن كشكولي الصغير أوي، لكن كدة هيبقى فيه مساحة للكلام إنه يطلع زي ماهو (مش لازم للمدونة). بقاله 4 أيام دلوقتي.. مشغولة بيه، فماكتبتش حاجة، أول حاجة عملتها إني طلبت من الراجل يسيبه فاضي.. وقضيت يوم كامل بنقل حاجاتي من البي سي للاب، أفلام وموسيقى وكتب وصور.. كتيـــــــــــــر أوي، حاجة أشبه بالتاريخ الشخصي.. جمعتهم في سنين،في نفس الوقت فيه حتة مني زعلانة عشان مابقتش أشارك جزء من حاجاتي مع إخواتي.. صحيح ده منع سبب مهم للخناق، بس لسة هشتاق للسبب ده.. كمان وإن احتمال أوي شغلي يبقى في محافظة تانية فأضطر أبعد عن البيت.. وأنا في انتظار أعرف تكليفي فين.


ايه المميز في اللاب بتاعي؟

إن شكله حلو وعاجبني.. مثلا!
القصة إني قررت من سنة إني هشتريه بقى، فحوشت شوية فلوس من مكافأة الامتياز الضئيلة جدًا طول السنة دي مع مايتبقى من عيديات (يادوبك جابت ربع تمنه مثلا ) ومن حوالي 3 شهور بدأت البحث الفعلي، ماكنتش فاهمة معنى الأرقام في البروسيسور والرامات ولا عارفة بيشتروا اللابات إزاي أساسا.. سألت أصحابي وخدت جولات على النت، ثم عجبني جدًا موديل فايو بشكل معين.. لما دورت في المحلات بقى ماشفتوش نهائي، وكل لفة كنت بشوف نفس الأنواع باختلاف ضئيل.. بس ايه بقى، بعد شوية بقيت أدخل المحل أرص المواصفات اللي عايزاها  وأسأله أسئلة عن أنواع محددة، ثم قررت أتنازل عن فايو أحلامي (الأغلى بطبيعة الحال) واشتري اتش بي أحمر بنفس المواصفات نظرا لأني ماشفتش الفايو ده خالص على الطبيعة.. قلت ماذا لو رحت له مخصوص القاهرة واستقريت برضه على اتش بي أو ديل ويبقى مشوار مالوش لزمة. إذن هو الإتش بي.. في يوم ما الأسبوع اللي فات بالليل كنت خلصت اللي ورايا ومروحة مع بابا وقلت هنروح نجيب اللاب دلوقتي قالي بشكل عابر: فيه محل واحد صاحبي اشترى منه لاب امبارح قريب من هنا، تيجي نشوفه؟ رحنا وأنا مش متوقعة حاجة.. أنا كنت قررت هشتري ايه ومنين، إذ فجأة عيني لمحت الفايو بنفس المواصفات اللي دورت عليها بنفس اللون والديزاين.. وياللسخرية، جنبه على طول الاتش بي الأحمر اللي كنت خلاص هشتريه. وقفت تلت ساعة قدام الاتنين متنحة.. بصيت لبابا-بما إنه هيدفع-قالي مش فارق معايا خدي اللي انتي عايزاه، وهكذا يا جماعة جبت الفايو البينك العسول اللي بكلمكم منه دلوقتي.



ماذا نتعلم من هذه القصة؟


ولا حاجة.. دي مجرد دردشة :)

1 comments


هل يأخُذه خَيالُ الشِعرِ إلى فتاةٍ في مدينة بعيدة
تؤنِس وحدتَها اليومية بأسفارِه؟


****
0 comments

الحَكي يُثقلني، لا أرغب فيه
أريد الآن حياة ليست رائعة، لكنها مُحتملة.

سفح الجبل لا يحتوي على بذرة مانجة

1 comments


كيف يمكن إثبات أن قمة الجبل الجليدي لها سفح كسائر الأشياء التي لا تبرز من العدم؟
أنا لا أعرف سوى قصة العميان والفيل، يمسك كل منهم بجزء ويصفه زاعمًا أن هذا هو الفيل.
هل نلوم الفيل إذن؟ في الواقع هو سيظل فيلا سواء أدركوه أم لا، وإن قالوا إنه "مانجة" حتى.

??

1 comments



الأَنبيَــــاء يَصمتون بالضرورة
عِندما يُصبِحون أَكثَرَ قُربًا
مِن الذي أَرسَلَهُم

لَم تَكُن الصعُوبة في أَن يَقفلوا أفواهِهم
بَــل،
في أَينَ يَضعونَ أَيديهم
عِندَما يَستَطيعون ذلك.

يَومًا ما ستتلَبسَني الحِكمةُ
وَلَن أَذهَب إلى الحَفلِ
وَسَيكونُ عليّ أَن أُؤرِخَ لحريتي
بِتلكَ اللّحظة
التي لَم أَعُد فيـها مَدينة لآذانِكُم.


إيمان مرسال
 أحيانًا تتلبسني الحكمة
  ديوان المشي أطول وقت ممكن

*الصورة من فيلم Pina

الشعب اللي رصيده خلص معايا

0 comments


اسمعوا  كريمة الحفناوي
يتأسف على ايه ولا ايه..

ده أنا اتقرفت أكتر من قرفي من حرقتها وهي بتتكلم

أنا مابقتش طايقة الأشكال الزبالة اللي عايشة حياتها عادي صفر على الشمال، الكلاب اللي الحياة بالنسبة لهم أكل وشرب ونوم وشايفين إن ده آخر مدى.. مش قادرة أسيطر على المرارة اللي جوايا من كم المهانة والاستفزاز الشهور اللي فاتت .

مجلس عسكري؟
لا مش ده خالص.

أنا دلوقتي فاهمة شعور اللي بيفجّر نفسه وسط الناس، لا هو عايز يعيش وسط غبائهم ولا عايزهم يعيشوا. يارب تموتوا بالحسرة والاضطهاد اللي احنا فيه.. جتكوا القرف.. جتكوا القرف.
2 comments


رغبة رحيل من كل شيء لنقطة مش معروفة مع إن كل حاجة زي ما هي.. علامات مضطربة، وكلام كتير، خاص على عام.. ومعتقدات آمنت بيها لفترة على المحك.. يبدو إني مستعدة أرميها بس عشان زهقت من كتر ما أثبتت فشلها، ماضي بيطلع لي كل شوية، ومستقبل أضيق من خرم الإبرة بس مضمون.


وأنا زهقت.. من اللي قبل كدة، واللي جاي، من الكلام الكتير.. من الخبط في دماغي اللي بهرب منه، من الراحة اللي ما بتجيش، زهقت من الهروب نفسه.

بيقولولي انتي مش كدة.. مش هتاخدي قرار لمجرد الزهق، بيقولولي اكتبي.. اتكلمي، ومين قال إني مش كدة؟ مين قال إن فيه حاجة تتكتب أو تتقال؟

ماحدش بيشوفني في المراية غيري، وأنا دلوقتي شايفة إني كبيرة.. ومش لاقية حد أكبر مني، مع إن اللي أكبر مني في السن كتير، وشايفة إني وحشة.. واللي بيقولوا عني جميلة كدابين، بقيت شايفة كل النواقص فيا كبيرة وواضحة. وكل اللي عارفيني-أو حتى ما يعرفونيش- شايفين فيا حاجات مش لاقياها.

السنة اللي فاتت كأنها كانت من عشر سنين، واللي جاي زي يوم واحد طويل مكرر، والثورة والمطر والصحاب والحب.. خط طويـــــــــل من الأحداث بقيت أتفرج عليه كأني مش موجودة فيه. هو أنا كنت موجودة أصلا؟